“İRS-Erbe” jurnalının yeni buraxılışı Azərbaycanda baş verən aktual hadisələrdən geniş söhbət açır.

Baş redaktor Musa Mərcanlının bu nömrəyə yazdığı ön sözdə Azərbaycanın dinamik inkişaf edən ölkəyə çevrilməsindən, Almaniya və bütövlükdə Avropa üçün getdikcə artmaqda olan əhəmiyyətindən, ölkəmizin qədim tarixi, zəngin mədəniyyəti, incəsənəti, o cümlədən Qarabağın hələ də tam sağalmamış yaraları haqqında Almaniya ictimaiyyətinin məlumatlandırılmasının mühümlüyündən bəhs edilir.

Budəfəki buraxılışın mərkəzi mövzusu ötən ilin noyabr ayında Azərbaycan Prezidenti İlham Əliyevin rəhbərliyi və təşkilatçılığı ilə Bakıda müvəffəqiyyətlə keçirilmiş COP-29 ekoloji konfransıdır. Məqalədə deyilir ki, Azərbaycanın iki yüzə qədər dövlətin nümayəndələrinin iştirak etdiyi COP29 ekoloji konfransına ev sahibliyi etməsi, dünyada ölkəmiz haqqında yeni əks-səda doğurmuşdur. Dubaydan sonra növbəti ekoloji konfransın keçirilməsi üçün məhz Bakının seçilməsi təsadüf deyil. Azərbaycan, neft-qaz sənayesinin inkişaf etmiş olduğu bir ölkə olmaqla yanaşı, həm də müstəqilliyinin ilk günlərindən ətraf mühitin qorunması üzrə normaları və üzərinə götürdüyü digər öhdəlikləri dönmədən yerinə yetirən bir ölkə kimi tanınır. Bununla yanaşı Azərbaycan öz ərazisində, ilk növbədə isə azad edilmiş torpaqlarında - Qarabağda və Şərqi Zəngəzurda - günəş, su və havanın gücünə əsaslanan “yaşıl enerji” istehsal edən xeyli sayda elektrik stansiyaları tikmişdir və onlardan daha çox tikməyi planlaşdırır.

İraq əsilli Britaniya memarı Zaha Hədidin layihəsi əsasında ərsəyə gəlmiş Heydər Əliyev mərkəzi bu gün dünyanın ən gözəl və ecazkar tikililərindən biri sayılır. Heydər Əliyev Mərkəzinə həsr edilmiş məqalə oxucuların diqqətini belə bir fakta yönəldir: Böyük Britaniyanın “Discovery” və “Science Channel” kanalları bu binaya ayrıca veriliş həsr etmiş, verilişin aparıcıları onu dövrümüzün ən cəsarətli mühəndis layihələrindən və arxitektura şedevrlərindən biri adlandırmışlar. Onların verdiyi qiyməyə görə bu yalnız bir mədəniyyət mərkəzi deyil, həm də dünyada öz yerini təsdiq etmək deməkdir.

Azərbaycanda teatr rəssamlığının inkişafından bəhs edən məqalə tanınmış sənətkar Bədurə Əfqanlının həyat və yaradıcılıq yoluna işıq salır. Avropa teatr tərtibatının incəliklərini öyrənəndən sonra, Bədurə xanım bu bilik və bacarıqlarını Azərbaycan həyatının xüsusiyyətləri, azərbaycanlıların həyat tərzi ilə müvəffəqiyyətlə uyğunlaşdıra bilmiş, çoxlu sayda tamaşalar, sonradan isə bir sıra filmlər üçün geyim eskizləri və dekorasiyalar hazırlamışdır.

Jurnal həm də özgəyə münasibət və onunla rəftar sahəsində alman oxucusunun diqqətini Azərbaycan xalqının çox mühüm bir xüsusiyyətinə çəkir. Bildirilir ki, tolerantlıq və qonaqpərvərlik Azərbaycan xalqının əsrlərdən bəri inkişaf etdirdiyi və böyük, mühüm bir ənənə kimi qoruduğu məziyyət olaraq insanlarımızın dünyagörüşündə mühüm yer tutur. Dünyada ikinci bir ölkə tapmaq çətindir ki, orada özgə dinə, mədəniyyətə, özgə xalqın adət və ənənələrinə Azərbaycanda olduğu qədər hörmət və diqqətlə yanaşılsın, onun abidələri və mədəniyyət nümunələri belə qayğı ilə qorunsun.

Alman publisist və fotoqrafı xanım Heike Maria Johenning isə Bakı arxitekturası haqqında (son iki yüz ilə aid) “İRS” jurnalı üçün ayrıca məqalə hazırlayıb, paytaxtımızın memarlıq nümunələrinin gözəlliyindən, özünəməxsusluqlarından, onları Avropa ilə birləşdirən tarixi və mədəni əlaqələrdən geniş bəhs edib.