Mayın 8-də Beynəlxalq Muğam Mərkəzində “Heydər Əliyev və Azərbaycan mədəniyyəti” adlı konfrans keçirilib.

Tədbirdə əvvəlcə Azərbaycan Respublikasının Dövlət Himni səsləndirilib, Ulu öndər Heydər Əliyev və şəhidlərin əziz xatirəsi bir dəqiqəlik sükutla yad edilib.

Daha sonra Ulu öndərin həyat və fəaliyyətinə həsr olunmuş videoçarx nümayiş etdirilib.

Tədbirdə çıxış edən mədəniyyət nazirinin müavini Səadət Yusifova müasir Azərbaycan dövlətinin qurucusu, dahi şəxsiyyət Heydər Əliyevin ölkə mədəniyyətinin inkişafındakı misilsiz xidmətlərindən danışıb. Diqqətə çatdırıb ki, Ulu öndər yalnız siyasət və dövlət idarəçiliyi sahəsində deyil, həm də Azərbaycan mədəniyyətinin formalaşmasında və yüksəlişində müstəsna rol oynamış liderlərdəndir.

“Ulu öndər Heydər Əliyev hələ gənclik illərindən sənətə, ədəbiyyata, musiqiyə və teatr sahəsinə böyük maraq göstərib. Sovet dövründə Azərbaycan SSR-ə rəhbərlik etdiyi illərdə mədəniyyət sahəsinin inkişafını strateji istiqamətə çevirib, mədəniyyət müəssisələrinin yenilənməsi, sənət adamlarının fəaliyyətinin dövlət səviyyəsində dəstəklənməsi istiqamətində əhəmiyyətli işlər görüb. Müstəqillik dövründə də Heydər Əliyev mədəniyyət siyasətini dövlət quruculuğunun vacib istiqaməti kimi müəyyən edib, bu sahədə əsaslı qanunvericilik və institusional islahatlar həyata keçirib. “Mədəniyyət haqqında”, “Müəlliflik hüququ və əlaqəli hüquqlar haqqında”, “Kinematoqrafiya haqqında”, “Muzeylər haqqında” və digər qanunlar məhz onun təşəbbüsü ilə qəbul olunub. Ulu öndər sənət adamlarına daim xüsusi diqqət və ehtiramla yanaşıb, onların sosial rifahının yaxşılaşdırılması, yaradıcılıq evləri ilə təmin olunması və əsərlərinin nəşrinə dəstək verilməsi üçün konkret addımlar atıb. Dahi lider teatr premyeraları, sərgilər və konsertlərdə şəxsən iştirak edib, sənət adamları ilə görüşərək onların problemlərinə diqqətlə yanaşıb. Bu gün Ulu öndərin ideyaları Prezident İlham Əliyev tərəfindən uğurla davam etdirilir. 44 günlük Vətən müharibəsindən sonra Qarabağ və Şərqi Zəngəzurda aparılan bərpa və yenidənqurma işləri çərçivəsində mədəniyyət obyektlərinin inşası və irsimizin bərpası bu siyasətin davamlılığının bariz nümunəsidir. Eyni zamanda Birinci vitse-prezident Mehriban Əliyevanın rəhbərliyi ilə həyata keçirilən layihələr Azərbaycan mədəniyyətinin beynəlxalq miqyasda tanıdılmasına mühüm töhfələr verir. Heydər Əliyev Fondunun təşəbbüsü ilə reallaşan tədbirlər ölkə daxilində və xaricdə böyük rezonans doğurur”, – deyə S.Yusifova əlavə edib.

Mədəniyyət sahəsində həyata keçirilən islahatların yeni keyfiyyət mərhələsinə qədəm qoyduğunu vurğulayan nazir müavini deyib: “Azərbaycan mədəniyyəti – 2040” konsepsiyasının hazırlanması, vergi güzəştlərinin tətbiqi və resursların təmərküzləşdirilməsinə əsaslanan mədəniyyət modeli istiqamətində atılan addımlar sahənin davamlı inkişafınının təminatına xidmət edir. Mədəniyyət Nazirliyi olaraq bu ideoloji xəttə uyğun şəkildə fəaliyyət davam etdirilir və mədəni irsin qorunması, inkişafı naminə görülən işlər daha geniş miqyas alır”.

Xalq yazıçısı Elmira Axundova Ulu öndərin incəsənətə, xüsusilə, teatra və musiqiyə olan marağını xatırladıb. O, Ümummilli liderin incə musiqi duyumu və rəssamlıq qabiliyyətinə malik olduğunu bildirib. “Səttar Bəhlulzadə, Tahir Salahov kimi sənətkarlarla dostluğu, sənət aləminə göstərdiyi diqqət və ehtiram onun mədəniyyətə bağlılığının nümunəsidir. Ümummilli lider Heydər Əliyevin uzaqgörənliyi, natiqlik bacarığı və fenomenal yaddaşı onu gələcək nəsillər üçün nümunəvi liderə çevirib”, – deyə o əlavə edib.

YAP Səbail rayon təşkilatının sədri Muxtar Nağıyev Ümummilli liderin siyasi fəaliyyətinə nəzər salaraq bildirib ki, Heydər Əliyev Azərbaycan xalqının milli kimliyini qorumaqla yanaşı, bu kimliyi əsaslandıran ideoloji konsepsiyanı da formalaşdıraraq onu real dövlət modelində tətbiq edib. O, Ulu öndərin yalnız ölkə daxilində deyil, beynəlxalq miqyasda da böyük nüfuz qazandığını vurğulayıb.

Konfransda digər çıxışçılar diqqətə çatdırıblar ki, Heydər Əliyevin bu sahəyə göstərdiyi diqqət və həyata keçirdiyi siyasət bu gün də Azərbaycanın mədəni inkişaf yolunda əsas istiqamət kimi qəbul olunur.