İyulun 7-də Milli Məclisin Mədəniyyət komitəsində “Tarix və mədəniyyət abidələrinin mühafizəsi və təbliğinə müasir yanaşma” mövzusunda ictimai dinləmə keçirilib.

Dinləmədə Milli Məclisin deputatları, aidiyyəti dövlət qurumlarının rəhbərləri və nümayəndələri, sahə mütəxəssisləri iştirak ediblər.

Komitənin sədri Polad Bülbüloğlu bu gün ölkəmizdə genişmiqyaslı bərpa-quruculuq işlərinin həyata keçirildiyini və bu istiqamətdə tarixi və mədəni abidələrə münasibətdə müvafiq işlərin görülməsi ilə bağlı fikirlərini açıqlayıb. O, tarixi abidələrimizin bərpası, mühafizəsi, tədqiqi və təbliği sahəsində mühüm addımların atıldığını bildirib. Həmçinin tarix və mədəniyyət abidələrimizin qorunmasına ictimaiyyət tərəfindən diqqət və qayğının artdığını söyləyib.

Sonra mədəniyyət naziri Adil Kərimli çıxış edib. Mövzunun əhəmiyyətindən danışan nazir tarixi və mədəni abidələrin Azərbaycanın mədəni irsinin mühüm tərkib hissəsi olduğunu deyib.

Nazir bildirib ki, Azərbaycan öz ərazi bütövlüyünü və suverenliyini bərpa etdikdən sonra mədəniyyət sahəsində dövlət siyasətinin həyata keçirilməsində yeni istiqamətlər müəyyən edilib. Bu istiqamətlər “Azərbaycan Mədəniyyət strategiyası 2040” sənədinin layihəsində əksini tapıb. Mədəni irsin növləri və əhatə dairəsi, onun idarə olunması, hüquqi çərçivəsinin müəyyən edilməsi kimi məsələlərin vacibliyindən söhbət açan Adil Kərimli nazirlikdə işçi qrupunun yaradıldığını, “Mədəni irs haqqında” qanun layihəsi üzərində iş aparıldığını, habelə mədəni irsə vahid baxış, vahid idarəetmənin formalaşdırılması, mədəni irsin bərpası, qorunması və təbliği istiqamətində tədbirlər planının hazırlandığını diqqətə çatdırıb.

Hazırda dövlət qeydiyyatında 6150 tarixi mədəniyyət abidəsindən 4300-dən çoxunun Mədəniyyət Nazirliyinin idarəetməsində yer aldığını deyən Adil Kərimli onların qeydiyyatı, pasportlaşdırılması ilə bağlı məsələlərin vahid çərçivədə həyata keçirilməsinin planlaşdırıldığını bildirib. Bu istiqamətdə “Tarix və mədəniyyət abidələrinin qorunması haqqında” Qanuna edilən son dəyişikliyin məqsədəmüvafiq olduğunu diqqətə çatdırılıb.

Nazir tarix və mədəniyyət abidələrinin qorunması sahəsində təbliğat və maarifləndirmə işinin vacib əhəmiyyət kəsb etdiyini söyləyib.

Prezidentin tapşırığı ilə tarixi və mədəniyyət abidələrinin bərpası istiqamətində ciddi işlərin həyata keçirildiyini, xüsusilə işğaldan azad edilmiş ərazilərdə dağıdılmış və zərər görmüş abidələrin bərpası və konservasiyası ilə bağlı genişmiqyaslı layihələrin icra olunduğunu vurğulayan nazir bu sahədə Birinci vitse-prezident Mehriban Əliyevanın rəhbərliyi ilə Heydər Əliyev Fondu tərəfindən önəmli addımların atıldığını xüsusi qeyd edib.

Dinləmədə Mədəniyyət komitəsinin sədr müavini Günay Əfəndiyeva, deputatlar Şahin Seyidzadə, Əlibala Məhərrəmzadə, Elnarə Akimova, Gülşən Paşayeva, Ülviyyə Həmzəyeva, Sahib Alıyev, parlament Aparatının Sosial qanunvericilik şöbəsinin müdiri Adil Vəliyev çıxış edərək, tarix və mədəniyyət abidələrinin mühafizəsi, milli mədəni irsin qorunması və gələcək nəsillərə ötürülməsi istiqamətində ölkəmizdə görülən işlər barədə fikirlərini açıqlayıblar.

Tarix və mədəniyyət abidələrinin elektron reyestrinin yaradılması ilə bağlı məsələnin vacibliyindən bəhs edilib. Həmçinin milli-mənəvi dəyərlərimizin qorunmasının gənc nəslə aşılanmasının önəmini qeyd ediblər. Abidələrin mühafizəsini tənzimləyən qanunvericilik bazasının formalaşdığını və bu istiqamətdə təkmilləşdirmə işinin davam etdirildiyi vurğulanıb.

Azərbaycan Memarlar İttifaqının İdarə heyətinin sədri Elbay Qasımzadə, Azərbaycan Memarlıq və İnşaat Universitetinin rektoru Gülçöhrə Məmmədova, Memarlar İttifaqının Memarlıq irsi üzrə komissiyasının sədri Rizvan Bayramov, “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud, AMEA-nın Memarlıq və İncəsənət İnstitutunun direktoru Ərtegin Salamzadə, Arxeologiya və Antropologiya İnstitutunun direktoru Fərhad Quliyev, müstəqil ekspert Faiq Nəsibov abidələrin qorunmasında institusional, maliyyə, insan resurslarının zəruriliyi, bərpa üzrə mütəxəssislərin hazırlanması, milli irsə diqqət və qayğı sahəsində ictimaiyyətin maarifləndirilməsi məsələlərinin əhəmiyyətindən bəhs ediblər.

Tarix və mədəniyyət abidələrinin aşkarlanması, bərpası, onların dövlət tərəfindən qorunan abidələrin siyahısına daxil edilməsi istiqamətində davamlı işlərin həyata keçirildiyi qeyd olunub. Abidələrin vəziyyətinə və istifadəsinə nəzarətin gücləndirilməsi, onlara vurulan zərərlə bağlı məsuliyyətin müəyyənləşdirilməsi, onların mühafizəsi sahəsində müasir texnologiyalardan geniş istifadə edilməsi və digər məsələlər barədə fikirlər səslənib.

Müzakirələr zamanı mədəniyyət naziri Adil Kərimli çıxışlarda səsləndirilən fikirlərə münasibət bildirib.