F. Köçərli adına Respublika Uşaq Kitabxanası “Oxu, yarat, qazan!” devizi ilə Yay festivalı keçirir.

Layihə uşaqların yay tətilini daha dolğun, məzmunlu şəkildə keçirmələri, eləcə də oxu mədəniyyətinin təbliği, uşaqlarda yaradıcılıq potensialının inkişafı və onların asudə vaxtlarının mənalı şəkildə təşkil olunması məqsədi daşıyır.

Festival aşağıdakı əsas istiqamətləri əhatə edir:

OXU – “Kitabların sehrli dünyasına səyahət et!”
Bu istiqamət üzrə uşaqları kitab oxumağa həvəsləndirmək onlarda mütaliəyə maraq yaratmaq məqsədilə interaktiv tədbirlər, oxu saatları və tematik müzakirələr təşkil ediləcək. Tədbirlər uşaqların kitablarla emosional və intellektual bağ qurmasına kömək edəcək.

YARAT – “Daxilindəki sənətkarı oyat!”
Yaradıcılıq bacarıqlarını üzə çıxarmaq və inkişaf etdirmək məqsədilə iştirakçılar üçün rəsm və boyama məşğələləri, tətbiqi sənət nümunələrinin hazırlanması, ekoloji əl işləri və müxtəlif tematik master-klasslar keçiriləcək. Bu istiqamət uşaqlarda estetik zövqün formalaşmasına və fərdi bacarıqların təşviqinə xidmət edəcək.

QAZAN – “Selfi çək, paylaş, ulduz ol!”
Festival iştirakçıları öz yaradıcı fəaliyyətlərini sosial şəbəkələrdə paylaşaraq müxtəlif nominasiyalar üzrə müsabiqələrə qatılmaq imkanı əldə edəcəklər. Bu, uşaqların özünü ifadəsini təşviq etməklə yanaşı, onların bacarıqlarının da inkişafına xidmət edəcək.

Festivalın keçirilmə müddəti: 18 iyun – 1 sentyabr 2025-ci il

Final mərhələsi: 10 sentyabr 2025-ci il

Festival çərçivəsində fəallığı ilə seçilən iştirakçılar müxtəlif nominasiyalar üzrə qalib seçilərək kitab hədiyyələri ilə mükafatlandırılacaqlar.

Ətraflı məlumat üçün bu linkə baxmaq olar.