F.Köçərli adına Respublika Uşaq Kitabxanasında “Müəllif saatı” adlı yeni layihəyə başlanılıb.

Kitabxanadan verilən məlumata görə, layihənin əsas məqsədi uşaqların ədəbiyyata marağını artırmaq, oxu mədəniyyətini zənginləşdirmək və onların yaradıcılıq qabiliyyətlərini inkişaf etdirməkdir.

Layihənin ilk tədbiri kimi martın 4-də Bakı şəhərində fəaliyyət göstərən Heydər Əliyev adına liseyin 2-ci sinif şagirdlərinin uşaq yazarı Mehriban Nağıyeva ilə görüşü təşkil edilib.

Görüşdə Mehriban Nağıyeva müəllifi olduğu kitablar haqqında uşaqlara ətraflı məlumat  verib və yaradıcılıq prosesindən bəhs edib. Müəllif həmçinin yaradıcılığı ilə bağlı oxucuların suallarını cavablandırıb.

“Müəllif saatı” uşaqların ədəbiyyatla interaktiv şəkildə tanışlığı və onların şəxsi inkişafı baxımından yaddaqalan olub.