F.Köçərli adına Respublika Uşaq Kitabxanasının 2 saylı filial əməkdaşları Dövlət Tibbi-Sosial Ekspertiza və Reabilitasiya Agentliyinin 2 nömrəli Uşaq reabilitasiya mərkəzində 5 may – Əlillərin Hüquqlarının Beynəlxalq Müdafiəsi Günü münasibətilə maarifləndirici tədbir keçiriblər.  

Kitabxanadan verilən məlumata görə, “Məhdudiyyətləri birlikdə aşaq!” adlı maarifləndirici tədbir çərçivəsində kitab sərgisi də təşkil olunub.

Kitabxana əməkdaşları tədbir iştirakçılarına əlamətdar gün haqqında məlumat veriblər.

Qeyd olunub ki, hər bir insan bərabər hüquqlarla doğulur. Cəmiyyətin inkişaf səviyyəsi onun fiziki məhdudiyyətindən asılı olmayaraq hər bir fərdə göstərdiyi qayğı və yaratdığı imkanlarla ölçülür. Xüsusi qayğıya ehtiyacı olan şəxslər cəmiyyətin ayrılmaz hissəsidir,onların hüquqlarına hörmətlə yanaşmaq hər bir vətəndaşın mənəvi borcudur.

Tədbir çərçivəsində mövzunu əhatə edən sosial videoçarx nümayiş etdirilib. Sərgidəki kitablarla  tanışlıqdan sonra əməkdaşlar tərəfindən  ibrətamiz hekayələr oxunulub.

Tədbirin keçirilməsində məqsəd xüsusi qayğıya ehtiyacı olan uşaqların ailədə və cəmiyyətdə bərabər imkanlara, sevgi və qayğıya layiq fərd kimi böyüməklərinə vasitəçi olmaqdır. Onların sosiallaşmasına, ictimai həyatın bütün sahələrində fərdi qabiliyyətlərinə və maraqlarına müvafiq fəaliyyət göstərmələrinə dəstək olmaq hər kəsin borcudur.